2011神山攻頂 - 意想不到的上山苦行(一)

6月4日晚上到達沙巴機場，為咗隆重其事迎接神山嘅挑戰，呢晚無奈地要飲少啲啤酒同早少少瞓覺，５日４夜嘅行程咁就過咗一晚。

第二朝倒塔咁早起身check out兼食咗個好豐富早餐，不得不提一提早餐時發生嘅小插曲：話說我地入住嘅nexus resort好多香港人都鍾意入住，包括旅行團嘅叔叔嬸嬸，朝早6點幾，餐廳職員仲準備緊各項早餐，當中煎蛋部未有人，幾個香港阿叔當咗個櫃台係自己屋企個廚房，竟然自己開爐炒蛋同煎火腿！我配服佢地嘅敢作敢為、尊重佢地助人自助嘅精神、兼欣賞佢地懂得靈活變通！阿叔 x 3，你哋係得嘅！

司機準時7點鐘到達酒店門口，3個女仔一早食定暈浪丸，因為車程都成個半鐘。8點半我哋去到神山公園嘅辦事處，等司機同我地辦手續，呢個時候大家都精神奕奕、雄心壯志，心裡的確係有少少緊張，但見到其他等上山嘅人都似係普通人，有老有嫩、有男有女，手瓜腳瓜冇特別起蹍，個心都當堂定啲！我當時心諗，我哋都應該handle到個山！

呢個時候我地個矮仔導遊走出黎自我介紹，馬拉人黎講佢真係屬於潮人一族，cap帽、短褲、leggings，再加上之後果日我見佢不停換裝，又紅色長襪又紅色格仔頸巾、一時長袖波衫一時又風褸，真係形象百變！唔知佢係撞聾定英文差，我真係同佢溝通唔到，所以一路上同佢都冇乜交流。

之後等埋幾個唔關事嘅人上車，10分鐘就去到1800米左右嘅起點。起點有一度大閘，重門深鎖，要對啱身份先可以放你入去，呢個位真係有少少得人驚，好似啲喪屍片咁，一放你出去就係一個恐怖嘅活死人世界，叫天不應叫地不聞，我地要不停咁跑上山逃避食人嘅喪屍～～～嘩！點啊！未開始行竟然有心寒嘅感覺！

9點35分正式開始上山，冇嘢吖～輕鬆喎！有平路亦有樹蔭，加上天氣晴朗，仲有2陣涼風，睇黎啲人話神山難行喺流料。呢個時候我可以用步履輕盈黎形容！唔使15分鐘，我地已經行到去0.5km果個牌，6km嘅lLaban Rata - 我地入住嘅地方應該好快到！

以我地咁嘅速度，好快就到達咗第一個休息站！每個休息站都有廁所同山水，設備都真係算唔錯！一路上除咗個導遊之外，仲有個女仔好似鬼咁吊住我地尾。佢一句聲都唔出，我地停佢就停，我地行佢又行，而且，佢行路係冇聲架... ... 佢想點啊？我忍唔住問導遊，呢位其實係你朋友吖、定係同你一樣係導遊呢？佢答我，呢個係porter... ...我冇見過porter除咗一個小背囊之外係冇其他嘢拎，同埋我沿途見到嘅porter都係揹住勁多嘢自己行得好快，唔會好似佢咁貼身無聲吊尾架喎... ... （結果上山到落山，就算導遊有好大段時間失咗踪，佢都係一直吊住我地尾，佢嘅存在至今都係一個迷）

行行行行行，一直都係樓梯，係咁上上上上上... ...死啦，開始黎料！行幾條樓梯就扯蝦！... ... 唔通我真係年紀大？冇理由吖，雖然我體能未至於係好好，但我都算係做開運動嘅朋友，冇可能咁差唶！呢個時候只不過係去到3.5km左右（2,634米高)，當時係12點50分，原來其他隊友都同我有相同嘅感覺！唔通就係傳說中嘅高山症？好辛苦呀！行7 - 8級樓梯就扯蝦得好勁，好似透唔到氣咁，揹住個好重嘅背囊以龜速慢行，我開始有一個好強烈想放棄嘅感覺！我係咪癲ｘ咗呀！用咁多錢走黎呢度貼錢買難受！人地去沙巴陽光與海灘去relax去潛水去晒太陽，我地做乜嘢要走黎行山呀？！香港行鳳凰山咪得囉！

救命呀！我幾時先上到去？我係咪上緊天堂呀？