2011神山攻頂 - 休息是為了爬更高的山

終於到咗吃晚飯的地方，3,300ｍ高的Laban Rata！真係好感動啊！在呢個冇交通工具到嘅地方，竟然有一個算係大嘅建築物，餐廳入面仲要係serve自助餐！喺呢個咁累嘅情況之下，呢度啲嘢食真係算好好好好味！有牛柳、雞肉、炒麵、沙律、蛋、炒菜、炸香蕉、芋頭西米露！我第一時間即刻喪食補充體力啦！不過vivi唔知發生咩事，一上到來就僕喺枱度，猛話想嘔，估唔到平時咁精靈、24小時要用到盡、精力旺盛嘅佢今次竟然打敗仗！阿per都有少少呆，但都叫做食到嘢，只有我同陳慧敏食完一碟又一碟，食完甜品又食番炒麵，超好胃口。

食完嘢，大約5:30pm左右，我地就行去我地瞓覺個地方，叫做Pendant House。由Laban Rata行去Pendant House有3-40級樓梯，我諗我用咗成2分鐘黎行... ... 高山症真係可怕，聽日真係仲登到頂嗎？要成3km喎！真係好擔心，所以唔理咁多，我同自己講，一上到去咩都唔理，上床瞓，為登頂作最後準備，希望身體可以喺呢10個鐘入面適應落黎。

呢間小屋好精緻，係咁高嘅山上，設備都真係算唔錯，比起富士山嘅元祖屋真係好好多，起碼有一整張床可以瞓！一入到去有個living room，有得沖咖啡飲茶吹下水，唔驚嘈到瞓緊覺嘅人！下層有2格浴室3格廁所，仲有地方俾你浪乾啲衫。上層有3間房，每間房有6張碌架床！我留咗下格床俾vivi，起碼半夜想嘔都方便啲！

我第一個上床瞓，因為堅係擔心第2日唔夠精神，雖然思想仲係少女唶，但身體已經係一個不折不扣嘅中女，唔可以輕視聽日攻頂嘅行程！

10分鐘到我就瞓著咗，一瞓瞓到夜晚８點幾，俾啲滴答滴答聲嘈醒... ... 唔係嘛？落雨？聽日點上山啊？8點開始啲雨一直都冇停過，仲愈落愈大，橫風橫雨又行雷又閃電！我覺得好凍，扎醒咗好多次，發咗好多個相同嘅夢，我夢見自己第2朝2點起身果陣vivi同我講話因為落大雨，上山路太危險所以安全為由，所有人都唔俾上山！我真係有一絲開心... ... omg!!!!!!!我潛意識竟然係好怕好唔想上山！點會咁架？？我嘅意志去咗邊？我真係覺得好罪惡呀！

最後全晚都瞓得唔好，2、3個字就醒一次，折騰咗一晚，斷斷續續到零晨2點，奇蹟發生了... ... 落咗一晚嘅雨竟然停咗呀！