星期五
放工後去左公司樓下一邊等順德人一邊做腳底按摩，雖然按得麻麻地，又唔平，但點都好過周街遊蕩！等到大少爺出現，去左旺角朗豪坊食mos burger,再施施然行上去UA睇8點 Terminator，點知拿飛果陣發現買錯戲院應該係broadway至真！平時如果係順德人買錯飛我一定鬧爆左佢，今次係我白痴買錯，我地淨係識勁笑，嘩哈哈～！用左10 mins 身水身汗走去broadway,好彩趕得切同埋套戲好好睇！
睇完戲約埋kai子去食糖水，Limlim打來話有冇嘢搞，我話不如去打牌，跟住就去左間樓上樓下都係夜總會既雀館。Limlim話11點就離開公司，點知等左佢成個鐘！其間我地去左新之城樓下機鋪玩。
星期六
一打就打到第2朝，好眼瞓呀，好彩唔係輸好多．．．食完早餐諗住番屋企，有人提議番大陸dup骨！好喎，橫掂都累累地！我地去左間好平但又幾乾淨既，$88 2個足鐘仲送一個大堂，真係好raw呀~哈哈！按完勁眼訓，一訓就訓到６點幾，跟住又去食嘢，食完又訓訓完又食，真係同隻豬冇分別！
星期日
一朝早同vivi , celina去行山,今次去萬宜水庫,一路行覺得好鬼悶,點解行成個幾鐘都係行石屎路!我地都好儈行石屎路!行行下見到一個牌寫住去北丫村,落45mins樓梯就有得食海膽,我地流晒口水,諗住去試下,點知d海膽打開得勁少嘢食,同埋郁下郁下都幾核突！其他嘢食超貴喎,一個海膽炒飯$150，炸魷魚又百幾，炒蜆都要百幾蚊呀！好慳咁食左一個星洲炒米同海膽炒飯，之後就再起行了。上山呢條路真係好甘><！上完d樓梯隻腳有少少想斷既感覺！我發現自己個心肺功能真係好差，尤其係上樓梯好快就扯蝦，真係要練下先得呀！好辛苦先上到頂，又要再行石屎路，一路行隔一陣又要避的士，真係好煩！一直走，去到堤壩，見到壩底有一個山洞，同埋有d唔怕死既人係度徒手攀石！本來我都幾想爬，但因為之後約左人趕時間，所以話唔爬，點知原來vivi咁堅，見佢蠢蠢欲試，咁我唯有捨命陪君子。就係咁，2個弱不禁風但又唔怕死既女子，咩住個大背囊走左去攀石。一開始攀都覺得有少少驚，因為扶唔實跌落去就係咁先，我地2個豬速攀石，終於爬到去個洞入面，又真係幾靚啊！入面係深不見底，真係好似武俠小說入面有高人練武功既地方！望下望下，個洞都幾陰森，都係不宜久留，快ｄ走啦．．．要爬番出都唔唔容易，因為d石好跣呀~有一下真係差d飛落去，好驚險架唔係講笑，好彩都順利爬出來，唔洗報警叫直昇機．．．
星期一二三四．．．
冇咩發生，只係．．．對腳勁痛呀！同埋個腳瓜long超粗呀！大件事啦～～～～～～
沒有留言:
發佈留言