2011神山攻頂 - 下山篇

喺山頂等埋阿per、 vivi 同陳慧敏影番張大合照，玩咗一輪就要面對現實．．．開始落山喇！雖然已經好累，但落山不受高山反應影響，一直都算順利，只係太多斜路的關係，落山要比較小心。歸心似箭，7點9開始落山，9點06分已經落到去check point，再度重遇掉低我地唔理嘅領隊同神秘女porter。今次領隊戴咗頂cap帽、紅色格仔頸巾、紅色長波襪，坐喺地下度chok住樣等我地，佢個樣真係令我好想打佢一穫！

愈落愈驚，點解啲路可以斜到咁？？？我哋究竟係點上來架？實在係太斜喇，一直都要拉住條麻繩游繩落山，對手真係好累，個心亦覺得好驚，一叉錯腳就碌落山係咁先，真係好危險啊！

10點半左右，我地就番到去3,300米嘅旅館。我地上山用咗差唔多4個鐘，但落山只係1個鐘頭45分鐘！入到去旅館就有豐富嘅早餐等緊我！有麵包、腸仔、茄汁豆、同埋我至愛嘅蛋！今次又係得我同陳慧敏2個喪食，vivi一入到黎就趴喺張枱度休息，阿per好似都食到少少嘢。執好哂啲行裝，11點半我地又要出發落山喇！今次一早準備好的雨具終於出場！落山時雨竟然冇停過！諗番起我地真係好好彩，上山時陽光普照、攻頂時全程停雨，真係好難得！人地話上山容易落山難，如果你話係富士山，我同意，如果係神山的話就一定係上山辛苦過落山好多！我地用神速落山，到達每個休息站都只係坐幾分鐘就繼續起行，4個人都好似上咗鍊咁！vivi都己經回復狀態喇！我對防水行山鞋真係perfect，地面好跣都影響唔到我，再加埋我件雨褸，落到山腳全身一啲都冇濕到！

終於都完成整個神山攻頂之旅喇！回到登山入口嘅時間係4:30pm！之後van仔來接我地番去神山公園。真係唔敢相信自己早上仲喺神山嘅頂峰，下午呢個時候竟然身處神山嘅山腳！陳慧敏、vivi、per，我地得咗喇～～～～　yeah！

2011神山攻頂 - 終於登上4095.2米的高峰

零晨1點半，聽到vivi把聲叫大家起身，佢似乎回復番正常、好番好多啦喎！我地就喺living room食一個簡單早餐，有燙多士可以塗牛油、花生醬同果醬，亦有茶包同即沖咖啡，喺呢個高地上都算豐富喇！我依然係胃口大開，一塊多士塗半層花生醬，正呀！平時我一定唔會食呢啲咁罪惡嘅食物，但今日係正值登頂之時，為咗神山我破例一次！不過阿per個樣仲係呆，頭痛同食唔到嘢，原來佢尋晚半夜起身嘔！我地一星期前開始食紅景天都好似冇咩幫助！

今次，我盡量放低哂背囊入面冇用嘅嘢，好似係我支天涯鏡、canon G11、行山杖等等，成個背囊即時輕番好多！2點鐘準備就緒，戴了頭燈、雨具、防水罩迎接之後3公里，領隊陸續來到帶領各人上山，我地等了又等，點解仲未見我地既guide？睇住其他人一個一個出發，我開始擔心，我真係唔想落後太多呀！終於我哋個Q版tour guide珊珊來遲，身後跟住上山一直吊住尾嘅神秘女"porter"， 2點半先見到佢哋人影！我地係pendant house入面最遲出發嘅一team！

地下經過一晚狂風暴雨嘅洗禮，又濕又跣，仲出現好多迷你小瀑布，所以步伐慢咗好多，喺3千幾米高嘅地方跣親真係唔係講笑！頭半公里我覺得都算係handle到，主要都係木梯、石梯同少量攀爬，好彩有攀富士山經驗，大家都有戴手套，否則唔對肉手唔磨薑都凍僵！

之後嘅「路」，我唔知可唔可以叫佢係路，根本已經唔再有平地，隨之而來嘅係一條粗過我手腕嘅麻繩，所有人都靠佢黎支撐身體上山，條「路」已經係成40至45度角，有幾段我甚至可以形容係一道牆，我唔敢想像如果我上面果個人體力不支鬆咗手會發生咩事，應該係所有佢下面嘅人都會好似保齡球咁碌哂落山... ... 好彩我上肢都算粗壯，不過呢個時候我見到好多人開始放棄，慢慢落山。就咁斷斷續續咁攀爬、手腳並用、上斜、上樓梯，feel到個心又跳得好快，條氣又開始唔順喇！可惡嘅高山症，點解你仲要纏擾住我啊！？真係好辛苦啊！咁大個人真係未試過咁不濟，行幾步就要停低抖幾下！我咁樣lan究竟要lan幾耐先上到山啊？

好辛苦先挨到去一個check point，大約係7.5km左右，有一個好似檢查站嘅物體，每個登山者都要check登山證先可以通過，如果唔記得咗帶登山證我諗我會喊喇... ... 咁辛苦先去到呢個位！就係呢個check point開始，我再見唔到我地嘅tour guide！佢真係一個不負責任嘅領隊，全程都唔見人，眼見人地啲領隊好細心，見你唔夠力就捉住你隻手拉你，有啲仲幫你揹嘢，我見有個揹住一個好大嘅腳架，斷估唔會係個guide自己帶上去影相架啦啩！佢一日掛住chok樣同換衫，真係頂你！我地同自己上去有咩分別？如果我地魂斷神山都冇人知啊！

個肉體慢慢 lan到上去8km，仲未望到羅氏峰(low's peak)，但個天已經開始光喇...... 當時係5:46分，我地唔可以照原定計劃喺羅氏峰頂睇日出，不過唔緊要啦，呢個位睇晨光都有另一番風味。之前一路爬都未有機會欣賞呢度嘅景色，我地喺呢個位停咗落黎小休一陣，原來風景真係好靚！

神山山頂的Donkey's Ear Peak

停咗一陣個身就feel到好凍喇，為咗要暖番身，差唔多時候要起行了，但係呢個時候仲係覺得好辛苦，呼吸仲係好唔順，vivi坐咗喺度目光呆滯，仲嘔起上來...... 要繼續上山唯有出絕招... ... 又係果招... ... 就係果招... ... 出場喇~~~~~~~~~~~~~~意志力~~~，之後嘅路就交俾你喇！！！我突然好似上咗鍊咁，衝呀！個心肺唔屬於我喇，唔好理喇，衝啊！終於見到羅氏峰啦，衝呀！見到8.5公里嘅牌喇，仲有0.5公里就上到頂啦，唔好放棄呀！ 我好似癲咗咁，冇理到我啲團友，一直衝，沿途有好多落緊山嘅人同我講「好快到喇，加油！」「It's very beautiful up there!!!!Don't give up!」終於... ... 到咗啦！4,095.2米的羅氏峰！就在2011年6月6日6點零6分，人生第一次用雙腳穿過雲層，走上4千米的高峰！

多謝一個鬼佬幫我影咗「一輯」單人相！神山，我終於征服咗你！

2011神山攻頂 - 休息是為了爬更高的山

終於到咗吃晚飯的地方，3,300ｍ高的Laban Rata！真係好感動啊！在呢個冇交通工具到嘅地方，竟然有一個算係大嘅建築物，餐廳入面仲要係serve自助餐！喺呢個咁累嘅情況之下，呢度啲嘢食真係算好好好好味！有牛柳、雞肉、炒麵、沙律、蛋、炒菜、炸香蕉、芋頭西米露！我第一時間即刻喪食補充體力啦！不過vivi唔知發生咩事，一上到來就僕喺枱度，猛話想嘔，估唔到平時咁精靈、24小時要用到盡、精力旺盛嘅佢今次竟然打敗仗！阿per都有少少呆，但都叫做食到嘢，只有我同陳慧敏食完一碟又一碟，食完甜品又食番炒麵，超好胃口。

食完嘢，大約5:30pm左右，我地就行去我地瞓覺個地方，叫做Pendant House。由Laban Rata行去Pendant House有3-40級樓梯，我諗我用咗成2分鐘黎行... ... 高山症真係可怕，聽日真係仲登到頂嗎？要成3km喎！真係好擔心，所以唔理咁多，我同自己講，一上到去咩都唔理，上床瞓，為登頂作最後準備，希望身體可以喺呢10個鐘入面適應落黎。

呢間小屋好精緻，係咁高嘅山上，設備都真係算唔錯，比起富士山嘅元祖屋真係好好多，起碼有一整張床可以瞓！一入到去有個living room，有得沖咖啡飲茶吹下水，唔驚嘈到瞓緊覺嘅人！下層有2格浴室3格廁所，仲有地方俾你浪乾啲衫。上層有3間房，每間房有6張碌架床！我留咗下格床俾vivi，起碼半夜想嘔都方便啲！

我第一個上床瞓，因為堅係擔心第2日唔夠精神，雖然思想仲係少女唶，但身體已經係一個不折不扣嘅中女，唔可以輕視聽日攻頂嘅行程！

10分鐘到我就瞓著咗，一瞓瞓到夜晚８點幾，俾啲滴答滴答聲嘈醒... ... 唔係嘛？落雨？聽日點上山啊？8點開始啲雨一直都冇停過，仲愈落愈大，橫風橫雨又行雷又閃電！我覺得好凍，扎醒咗好多次，發咗好多個相同嘅夢，我夢見自己第2朝2點起身果陣vivi同我講話因為落大雨，上山路太危險所以安全為由，所有人都唔俾上山！我真係有一絲開心... ... omg!!!!!!!我潛意識竟然係好怕好唔想上山！點會咁架？？我嘅意志去咗邊？我真係覺得好罪惡呀！

最後全晚都瞓得唔好，2、3個字就醒一次，折騰咗一晚，斷斷續續到零晨2點，奇蹟發生了... ... 落咗一晚嘅雨竟然停咗呀！

2011神山攻頂 - 意想不到的上山苦行(二)

3.5km個牌，影嘅時候係12:50分，到4km呢個牌，係13:32分... ... 我地用咗42分鐘先向上爬升咗0.5公里！喺呢漫長嘅42分鐘入面，我終於知道自己漏咗啲乜... ... 果樣嘢真係好緊要... ... 就係來之前認真地鍛鍊體能！老土到爆但都真係要講，平時鍛練真係好重要！我呢一刻真係好後悔做咗呢件蠢事，神山係俾神人行，唔係俾我呢啲人行架！ 我一路望住啲神人(porter)一個個咁超越我哋，一路不停扯蝦，我覺得同自己個肺感覺好陌生，佢好似唔再屬於我咁！明明腳唔累，但條氣管好唔順，我個心又不停狂跳(呢個時候要播番首五月天：一顆心噗通噗通地狂跳 一瞬間煩惱煩惱煩惱全忘掉　我再也不要 再也不要 委屈自己一秒... ...)我個心真係好想放棄啊！

由一開始行木梯到之後石梯，跟住係行小石路，然後到行石頭，到咗呢個位，我唔知係行乜！點啊！做咩要遊繩上！後悔嘅感覺又黎啦！今次係問自己，點解唔俾少少錢請porter幫我揹嘢呢？做咩之前扮晒嘢話要挑戰自己，死要自己揹咁重嘅背囊？呢一刻開始，個腦已經一片空白，只係不停咁諗仲有2km，挨多陣可以休息啦！成段路行廿級樓梯就休息一分鐘，去到5km個牌嘅時候，時間係14:57分... ...我地用咗1個鐘頭25分鐘去行1km，真係前所未有咁慢呀！

蝸牛速去到5.5km個牌，當時係15:49分，個人終於到振奮番少少，因為見到好靚嘅雲海！呢個時候更係要拎部相機出來狂影啦！反正都唔會趕得切4點前去到Laban Rata做到Via Ferrata嘅briefing！

仲有0.5km渣！！！唔好

放棄，我地衝呀！lan都要lan到上去，好快就可以食餐飽同大覺瞓啦！！！！

Laban Rata，

我想得妳好苦啊！終於到見到妳了！16:43分終於都見到我地食飯嘅地方Laban Rata，最後果0.5km，我地竟然用咗成54分鐘！可惡的高山反應，我真係低估咗你！

2011神山攻頂 - 意想不到的上山苦行(一)

6月4日晚上到達沙巴機場，為咗隆重其事迎接神山嘅挑戰，呢晚無奈地要飲少啲啤酒同早少少瞓覺，５日４夜嘅行程咁就過咗一晚。

第二朝倒塔咁早起身check out兼食咗個好豐富早餐，不得不提一提早餐時發生嘅小插曲：話說我地入住嘅nexus resort好多香港人都鍾意入住，包括旅行團嘅叔叔嬸嬸，朝早6點幾，餐廳職員仲準備緊各項早餐，當中煎蛋部未有人，幾個香港阿叔當咗個櫃台係自己屋企個廚房，竟然自己開爐炒蛋同煎火腿！我配服佢地嘅敢作敢為、尊重佢地助人自助嘅精神、兼欣賞佢地懂得靈活變通！阿叔 x 3，你哋係得嘅！

司機準時7點鐘到達酒店門口，3個女仔一早食定暈浪丸，因為車程都成個半鐘。8點半我哋去到神山公園嘅辦事處，等司機同我地辦手續，呢個時候大家都精神奕奕、雄心壯志，心裡的確係有少少緊張，但見到其他等上山嘅人都似係普通人，有老有嫩、有男有女，手瓜腳瓜冇特別起蹍，個心都當堂定啲！我當時心諗，我哋都應該handle到個山！

呢個時候我地個矮仔導遊走出黎自我介紹，馬拉人黎講佢真係屬於潮人一族，cap帽、短褲、leggings，再加上之後果日我見佢不停換裝，又紅色長襪又紅色格仔頸巾、一時長袖波衫一時又風褸，真係形象百變！唔知佢係撞聾定英文差，我真係同佢溝通唔到，所以一路上同佢都冇乜交流。

之後等埋幾個唔關事嘅人上車，10分鐘就去到1800米左右嘅起點。起點有一度大閘，重門深鎖，要對啱身份先可以放你入去，呢個位真係有少少得人驚，好似啲喪屍片咁，一放你出去就係一個恐怖嘅活死人世界，叫天不應叫地不聞，我地要不停咁跑上山逃避食人嘅喪屍～～～嘩！點啊！未開始行竟然有心寒嘅感覺！

9點35分正式開始上山，冇嘢吖～輕鬆喎！有平路亦有樹蔭，加上天氣晴朗，仲有2陣涼風，睇黎啲人話神山難行喺流料。呢個時候我可以用步履輕盈黎形容！唔使15分鐘，我地已經行到去0.5km果個牌，6km嘅lLaban Rata - 我地入住嘅地方應該好快到！

以我地咁嘅速度，好快就到達咗第一個休息站！每個休息站都有廁所同山水，設備都真係算唔錯！一路上除咗個導遊之外，仲有個女仔好似鬼咁吊住我地尾。佢一句聲都唔出，我地停佢就停，我地行佢又行，而且，佢行路係冇聲架... ... 佢想點啊？我忍唔住問導遊，呢位其實係你朋友吖、定係同你一樣係導遊呢？佢答我，呢個係porter... ...我冇見過porter除咗一個小背囊之外係冇其他嘢拎，同埋我沿途見到嘅porter都係揹住勁多嘢自己行得好快，唔會好似佢咁貼身無聲吊尾架喎... ... （結果上山到落山，就算導遊有好大段時間失咗踪，佢都係一直吊住我地尾，佢嘅存在至今都係一個迷）

行行行行行，一直都係樓梯，係咁上上上上上... ...死啦，開始黎料！行幾條樓梯就扯蝦！... ... 唔通我真係年紀大？冇理由吖，雖然我體能未至於係好好，但我都算係做開運動嘅朋友，冇可能咁差唶！呢個時候只不過係去到3.5km左右（2,634米高)，當時係12點50分，原來其他隊友都同我有相同嘅感覺！唔通就係傳說中嘅高山症？好辛苦呀！行7 - 8級樓梯就扯蝦得好勁，好似透唔到氣咁，揹住個好重嘅背囊以龜速慢行，我開始有一個好強烈想放棄嘅感覺！我係咪癲ｘ咗呀！用咁多錢走黎呢度貼錢買難受！人地去沙巴陽光與海灘去relax去潛水去晒太陽，我地做乜嘢要走黎行山呀？！香港行鳳凰山咪得囉！

救命呀！我幾時先上到去？我係咪上緊天堂呀？

2011神山攻頂 - 為神聖的神山作好準備

自從上年８月去行日本富士山，經歷上山時落雨落到底褲都濕埋、等日出時凍到豬唇發紫、兼落山爆咗幾粒水泡，甩了４塊指甲，我深深明白到一句說話：「(登頂)機會只係會俾做足準備既人」， 所以為咗今次神山之旅，真係做咗好多準備工夫，自己而家回想番都覺得好誇張！

神山住宿：

沙巴政府規定，上神山一定要有tour guide帶領，並且要預約山上住宿，之前睇過好多blog都話要成一年前預約，所以我地12月就已經透過個website book咗攀登神山+Via Ferrata二日一夜package。

http://sabahyou.com/tour_kk_climb2d1n.php

紅景天：

出發前一個月，陳慧敏已經幫大家買咗紅景天。紅景天其實係一種著名既中藥，作用是「活血化瘀」，在西藏當地常被用來當成治療高山症的良藥。上年行富士山時都有食，見到啲日本人係咁吸氧氣，相比之下自己就好似行得好輕鬆咁！

衣服類：

呢一個部分投資最大，正所謂唔行得都睇得，就算行唔到都影到靚相吖，反正呢個地方都只係會去一次。

Columbia摺得埋防uv帽

north face背囊(上年日本買)

karrimor跣水行山短褲

nike keep warm leggings

caravan防水行山鞋

trespass加厚羊毛襪

karrimor羽絨褸

columbia fleece

columbia 雨褸

columbia 風褸

絕對要高度讚揚我對行山鞋同襪，冇咗佢地唔會有今日完好無缺既腳趾！對鞋夠哂抓地，仲好舒服，絕對防水，加埋對厚襪一啲都唔焗，除鞋都唔臭呀！(至少我聞唔到！) 而且價錢仲唔貴，在沙木尼會員價折咗都係HK$649，今次the star of kinabalu呢個獎唔頒俾佢頒俾邊個啊？最後件fleece都冇著到，因為我件羽絨褸夠哂暖。

行山用品類：

頭燈 (放棄了之前鴨記的cheap cheap頭燈，因為真係好差，成日自己開關同跌啲電出來）

淘宝買行山膠粒手套

萬用頭巾(可以用來曚面保暖)

防水腳套

毛巾

頭痛藥

感冒藥

太陽眼鏡

保礦力粉

水壺

t-shirt替換

萬用刀(冇用到)

朱古力(冇食到)

鴨記行山杖(勁後悔買咗佢,奉勸大家用多少少錢買好少少)

住宿用品類：

即棄洗頭水沐浴露吸濕巾全部冇用

「工欲善其事，必先利其器」呢句至理名言，相信大家都好明白，不過準備咗咁多嘢，竟然漏咗最重要一樣嘢！！！！！係咩呢係咩呢？？？大家估唔估到？慢慢睇落去大家就會知！

菲律賓donsol潛水之旅 - 潛水篇DAY 3 & 4

第3同第4日，每日潛3次 ，成個trip下潛8次，總括而言，成個trip都有點令人失望 ,比起上年的PG trip爭好遠,無論係個diving master,抑或係水質,甚至乎係diving center既服務同設施,都係上年la lagoona reesort好好多!好真係好掛住PG個DM Ogie,佢唔單止有型、風趣優默、專業、英文好,仲好細心,真係好易會愛上佢!今次呢個DM Marcus,唔靚仔,唔細心,帶唔到我地睇嘢,又唔明佢講乜,仲要大肚腩,真係嬲嬲地,唉!好彩新認識既潛友都好好人,包括阿yen、阿豪、kelvin等等,都未至於零分!

day 3,影咗好多海兔仔同其他細嘢,全部都在香港見過的,有少少失望啦,不過都好靚既~

day 3夜晚night dive,俾萬惡既海刺拮親,呢款係識得追住人來拮的!

到左day 4,大家都好想睇魔鬼魚,好啦,marcus話帶我地去睇,去到一個一望無際既海中心,水深30米左右啦,一落水就feel到好大水流,marcus指示我地用pointer插住個地下,然後大家望住同一個方向,係咁望,係咁等,等左十分鐘,魔鬼魚唔得閒理你,死左去唔知邊,氣已淨番唔多,咩都未睇到就要升水做safety stop, day3第一個dive叫運吉。

可惡的水流,令到我對腳fin到好累!

好啦,第2個dive,俾多次機會你,又去等魔鬼魚,今次轉地方,結果都係等唔到,魔鬼魚影都唔見,marcus又話平時好多,好彩睇佢唔到,都睇到幾群大魚,跟住又升水了。

第3個dive,marcus同我地講sorry,話咩都俾唔到我地睇,問我地今次想睇乜,阿yen話唔想放棄,好想搏多次睇魔鬼魚,咁好啦,真係最後一次機會,marcus話有30%機會睇到,咁今次我估都會見到掛~~~點知,等了又等,魔鬼魚理得你死,佢係都唔出現,只係見到佢個friend sting ray仔,不過咁,marcus今次都算做番件好事,帶我地去到一個shark cave,見到一隻大肚既white tip鯊魚!!!

就咁,5日4夜的donsol之旅完結了,最令我難忘既係見到可愛既鯨鯊,期待下次有機會再去pg呀!好掛住ogie!!!

菲律賓donsol潛水之旅 - 潛水篇DAY 2

不知從何時開始我喜歡上潛水，我喜歡在水底那種遠離繁囂、寧靜、與世無爭的感覺，喜歡被水底那些新奇生物驚訝、喜歡看一望無際的海洋世界、喜歡在水底無摳無束反地心吸力地游動、喜歡讚嘆大自然的偉大，還有那種獨有的刺激感．．．


今次旅程除了是追蹤鯨鯊，還有一連8個下潛。第2天看完鯨鯊後，下午潛了２次，第一次實在是驚險萬分！第一個潛點是Bobby's Wall，descend到28米時，我遇到了生平裡最大的current！一個DM帶著12人下潛，一下水，我的buddy就不見了！由於水流太大，我用pointer插在崖壁上，眼見一個個潛友被水流沖走，還有撞上了另一班為數11人的team，一時間所有人都不知所措，情況十分渾亂！去吧，任由水流沖走，反正都會在同一個地點遇上，竟然遇上危險的up current！如果不潛水的人可能不知道，up current可以是很危險的，它可以把你一下子扯上水面，引起減壓病，輕者頭暈、流鼻血、四肢疼痛，嚴重的死亡！我立即release BCD的氣，再抓緊石頭，慢慢升水，原來有３個潛友都被扯上水面了，2個女仔在哭，因為上到水面時，一個人也沒有，又沒有船，太害怕了！由於有current的關係，只拍了數張黃色海參相就收起相機了，可惜。

大家陸續上船，有人在餵魚（嘔），有人感到頭痛，幸好所有人都安全，不過頭痛的那位要上岸吸純氧了！驚險完，其實大部份人都是很富經驗的潛友，鎮定到得人驚啊！準備去第2個潛點Manta Bowl，目的是要拍到魔鬼魚！誰知今次雖然沒有strong current，卻是「水母間」，海中滿佈水母，一邊潛一邊撥開水母，可以都逃不過被水母襲擊的命運．．．每一個人上水都紅紅腫腫．．．等不到魔鬼魚，而且禍不單行，船在航行途中拋錨，大家飢寒交迫地過了３個小時．．．回到所謂的resort，冇熱水，花灑冇力像下毛毛雨．．．．．．整天都不太順利．．．