泰拳教練

尋晚如常去打拳，遇到個癲佬，而家諗番仲係好嬲啊～事緣係我打沙包練拳果陣，個教練turbo係咁搞住晒同我扮friend，好煩，又用個厚墊打我，搞到我背脊好痛，一時又踢我，都算喇，跟住我同另一個教練阿lung對打果陣，佢又係咁搔擾住晒，我忍唔住中咗佢個肚一嘢，之後佢就好似癲咗咁，左手捉住我隻腳，右手按住我膊頭，我勁郁都走唔到！我個friend見到咁即刻用個墊狂打佢個頭，佢都照捉住我！跟住我轉身諗住縮腳又縮唔到，搞到成個人跌落地！我同阿lung講話你可唔可以阻止佢咁做，佢又唔識聽！

火都嚟啊～諗住算啦，忍你一次！繼續同阿lung打，佢教緊我俾對手捉住隻腳應該點破解！我真係好需要學呢招啊！點知turbo轉過頭又嚟！今次走過黎2隻手捉住我條頸，再用膝撞我！雖然佢冇用力，但我俾佢捉住走唔到，真係好嬲啊！我feel到佢對手痴住我成條都係汗嘅頸，真係好嘔心！我咩都做唔到，只係可以大哎，佢先走開！我都feel到阿lung都嬲嬲地，阻住晒，但佢又唔出聲，見住我俾人洽！

聽日唔好再俾我遇到佢，我真係會忍唔住鬧佢呀！

夜登鳳凰山

等左咁耐，終於可以一試香港行夜山滋味，除咗今年年頭環島行嘅時候行過一個鐘，同埋日本富士山之行，都未真正試過行夜山，今次仲有一個目的，就係睇下香港山上嘅日出。今次行山適逢係富士山之旅２周月紀念，又係同原班行山密友一齊行，咁多重意義，令我更加期待！

今次10點約喺深水埗，坐per架車去荃灣食宵夜，大家坐嘅位置同我地日本自駕遊一樣！真係令人好懷念。日本富士山之旅嘅威力真係好強，到今時今日大家都未能忘懷，尋日先收到陳慧敏facebook send過來嘅富士山新聞，你地話有咩可能會唔記得！

講番個行山，我地揀咗去東涌搭的士去伯公坳上山，睇啲行山網話大約行2個半至3個鐘，我地開始上山果陣差唔多2點，諗住慢慢行，途中見人過人，見到有人抽筋，又有人拗柴，我地4個都行得好輕鬆，行下行下，不知不覺已經上到頂，果陣只係過左1個鐘頭45分鐘！心諗大鑊啦，要食幾個鐘頭風！

我地好好彩，搵到個位挨住舊大石諗住瞓少少，當時我地4個嘅排位又係好似富士山元祖屋入面咁，睇黎我地真係上晒腦！我拎晒啲長袖衫、帽、頸巾出來包到成身密不透風，但只係瞓到半個鐘，一黎係啲石好尖，二黎啲行山人真係好嘈，多人都好似花市咁，三黎我凍到個身震晒，真係好辛苦，我諗我當時個嘴唇應該係紫色．．．好辛苦挨到日出，點知勁大霧，咩都睇唔到，就係咁，個天光咗，我地就好運吉咁落山了，惟有同自己講，最靚嘅日出我已經喺富士山頂睇過，一啲都唔可惜，而且我地今次夜晚望上天空見到滿天繁星，都算係不枉此行。

開始落山喇，由鳳凰山行去昂平要經過著名嘅「天梯」，行過先覺得佢真係名不虛傳，每一級都好高，而且中途冇休息站，要一直係咁喪行，真係好慶幸上山冇揀到呢條路，我呢啲上樓梯咁差嘅人，應該唔係好頂得順！一直係咁行行行，就遠遠見到個大佛，行到去先至係7點幾，真係未見過咁冷清嘅天壇大佛同昂平市集，點都要影番張相留念！

時間尚早，我地決定去埋大澳行下食早餐，原來得我一個未去過大澳！我都幾鍾意呢個地方，好簡樸，好和平，我諗有機會我都會再去，但一定要係一個唔曬嘅日子，當日我地晒到牛晒，嘢都唔想講，最後買埋蝦醬就走喇。

有一樣嘢真係估唔到，第二日瞓醒大脾超痛！點解會咁架？明明一啲都唔辛苦，點知仲要痛咗3日！究竟係上山出事定落山出事呢？不過其實我都幾鍾意肌肉痛嘅感覺，仲要係愈痛愈開心，我覺得自己呢一方面都幾變態。

同場忍唔住要加映vivi個行山look，勁sharp！so far除左喺日本，喺香港未見過人咁著，我真心like！希望香港嘅行山同運動衫可以追行上日本嘅潮流啦！行都行得開心啲！

單車來回大圍大美篤後記

今次點都要寫一寫個後記，主角1號係我用$60租番黎嘅單車(記住唔好再去果間奧運/亞運租單車)，試車果陣睇佢唔出原來係physical部動感單車，即係要不停踩唔可以停，一停佢係唔識跣住去嘅動感單車！頭果23km真係累得我，曾經有一刻覺得好失落，喺度問自己，點解vivi可以踩單車快到由人咁高變成了一粒微塵，而我就踩到又熱又累，飲咗1支水加2支保礦力！10km左右per曾經試咗少少我部車，佢話部車冇事喎，我就更加唔開心，喺度諗點解細個踩咁多次呢條路鬼咁輕鬆，大大話話都踩過3、40次，估唔到今時今日嘅我竟然要擔心之後果40km點算，真係唔認中女都唔得！

呢個時候要講一講主角2號，即係阿per，佢喺23km果陣同我交換咗部車，呢個真係開心大發現，原來唔係我個人嘅問題囉！我踩住佢架車，之後真係好輕鬆啊！輕鬆到真係好似識飛咁，仲好有閒情睇風景同睇其他踩單車嘅人！我見到有個女仔著超低胸衫踩單車呀！條事業線有手板咁長啊！仲見到啲人好搞笑架，鍾意ｓ型咁行，同埋特登去到路口位或者轉彎位先停車仲要停路中心架！呢啲其實都唔係重點，呢個post其實係要讚揚阿per呢個英勇行為，幫我哽咗部動感單車！ per，thank you啊！

打破個人紀錄

今次真係做運動做到喪咗，因為由9月18日至到今日10月3號，我都有做運動，今次維持了16日，史無前例，我開始覺得自己癲，聽日要俾自己休息一日，後日再嚟！

18/9 泰拳
19/9 跑步機60分鐘，8km
20/9 跑步機 60分鐘，8km
21/9 泰拳
22/9 跑步機 60分鐘，7km
23/9 泰拳
24/9 跑步機60分鐘，8km
25/9 泰拳
26/9 跑步機60分鐘，7km
27/9 跑馬地運動場8km
28/9 泰拳
29/9 跑馬地運動場 3km
30/9 泰拳
1/10 銅鑼灣運動場 6km
2/10 泰拳
3/10 大圍大美篤單車來回51km

不得不提嘅係29/9，點解只係跑咗3km!!?? 果日約埋個friend一齊跑，佢由未放工開始就send個email黎話不如唔好跑去睇戲，到去運動場途中講咗3次魔鬼嘅說話，例如「不如唔好跑喇，我請你食韓燒吖」，再黎到跑緊果陣再話不如今次跑少啲，搞到最後跑咗2個圈終於受唔住佢引誘走左去食壽司！我諗下次同佢跑真係諗諗先！

呢個星期最開心嘅係download咗個nike GPS個app，除咗最基本嘅係記錄到跑咗幾多km同平均速度外，仲睇到路線圖，同埋每段路唔同嘅步速；跑緊果陣每1km都會提一提你跑左幾多同埋速度，而且仲可以upload上nikeplus.com．以後可以check得番所有record，同埋睇到啲圖表分析，真係好好用呀！

不過好可惜，呢個app只係support到跑步，其他運動好似踩單車、行山咁都support唔到，所以今次踩單車試用咗另一個叫Run Keeper嘅app，又ok喎！我覺得做運動愈來愈好玩啦！