窮入肉

今日收到月結單，outstanding係2萬幾蚊... 唉...逃避唔到，始終都要面對日本之旅嘅使費！還完卡數之後，今次真係窮到開巷！睇黎呢2個月都唔可以買嘢，仲要儲錢下年去神山同潛水，仲未計交稅單嘢！

之前成日幻想自己係有錢人，可以weekend特登搭飛機去台灣打邊爐，或者去泰國做message，再唔係去一去上海食個小籠包next day番香港，你話幾咁爽！原本呢件係遙不可及嘅事，點知竟然發生喺身邊嘅人身上！！呢ｄ咁嘅crazy weekend trip真係恨都恨唔到，只可以講一句，有錢人真係唔同啲，人地weekend搭飛機去台灣為左飲茶，我番大陸揼骨都要諗過先，同人唔同命就係咁解。

跟住好灰咁諗，如果有一日我真係窮到三餐一宿都成問題，我可以點做？我已經諗左一條絕世cheap橋，就係日日去physical打等，有冷熱水沖涼、有沐浴露洗頭水護髮素，可以睇埋電視同幾份報紙，有mood仲可以去焗桑拿同做yoga，都係2xx一個月，可以慳唔少水費電費同報紙錢；放工喺公司笠廁紙同裝蒸餾水，再攞埋ｄ雜誌同報紙去賣！諗起都覺得自己變態！！

著火 + 跑到停唔到

今日發生咗啲事，個人著晒火，慶到爆裂，忍唔住send左email俾5個朋友，好開心即刻有3個電話打來tum番我，另外仲有一個call miss咗，真係好安慰、好開心！

放工團火仲未熄，諗住跑步盡情發洩，咁岩同事又一齊放工話跑步喎，咁不如join埋喇，橫樹我又未跑過街，點知佢原來係癲嘅，join埋啲跑步會同啲癲人一齊跑，即係人地練比賽跑10km 20分鐘跑完果啲！點啊？佢聲稱自己都係heir跑，不過都覺得唔好意思，要佢跟住我嘅步速。跑街同跑步機真係好唔同，跑街係比跑步機辛苦，覺得個膝頭壓力大啲，同埋天氣比較熱，第一個圈已經流晒汗，但係感覺真實好多，每一下腳落地都好實在，要上斜落斜重要睇路睇人，而且迎面有風撲埋黎，好舒服，而且途中會有其他人一齊跑，感覺冇咁寂寞，唔似跑步機咁，見親都係人地個背脊，仲要個個跑10分鐘左右就閃人，同埋跑完對腳好飄。平時跑步機10km可以唔停咁跑，今次第一次跑街唔好去咁盡喇，跑4.5km停一停先再跑4.5km。馬場真係一個跑步嘅好地方，可以再黎！

小成果

今日，10km，1小時10分鐘。lunch破戒食左飯。

經過短短5日嘅地獄式訓練同節食，已經輕咗2磅，oh yeah~！
不過我知道呢2磅係假象，只要我食番嘢佢就會番黎，所以我係唔會放棄架，不過真係有難度，要我一個咁為食嘅人日日淨係食菜，真係好慘......

努力流汗

近來沒事好做，只是番工、放工，真的好想再去旅行，特別是神山同單車環島遊，真的令我很嚮往，真的好想好想好想再一次踏上高峰看日出，欣賞腳下的雲海，跟團友說一聲加油，聽其他人為我打氣；好想好想好想踏著單車，背著背包沿海邊吹著海風，累時跟團友說說笑再上路，晚上在海邊看星，好想好想盡情地流一次汗......原來只有全身累到好像不屬於自己的時候，我才感覺自己的存在；原來把自己的氣力用盡，才覺得對得起自己；原來透過選擇甘願承受痛苦，才能認識真正自己。

醒覺

有時真係唔怪得人。我份人咁為食，唔肥30磅上天算對我唔錯。一番到屋企就想開雪糕食，臨瞓前又可以打開個雪櫃搵嘢食，自制能力奇低，呢期仲要做埋酒鬼，我真係唔可以再咁樣放棄自己喇！做唔番super model都唔好做肥豬啦，呢期已經成日俾人叫肥妹鬼，好傷心．．．

最黑人僧係，明明今日放工要去跑步，無情情俾人叫左去食自助餐囉！點會咁架？

我而家好嬲呀！好嬲我自己囉！

3年驚嚇

2007年，super model嘅身型。2010年，肥豬的體型。18磅脂肪唔知點得番黎。陳慧敏你喺日本影我咁多背脊相我知你都係想迫我減肥。好！呢一個月，大家睇實我。我就用呢張相做wallpaper激勵自己！

拳拳到肉

今日好似平日咁上拳館打拳,因為星期六冇女仔班嘅關係,要同d男人一齊打。真係好想講一講有個企我隔離著橙色衫嘅肥佬,真係當個沙包係殺父仇人咁,眼神兇狠不特止,仲要真係超大力,務求要打穿個沙包為止,仲要每打一下自己就喺度怪叫,我見到佢個partner勁驚,頂住個沙包果陣滴晒汗。個肥佬大力不特止,一有空檔大家休息緊嘅時候佢就自己狂做掌上壓,跟住又喪做sit-up,真係令到人好有壓力!到我同泰仔打果陣,佢望住我,搞到我好唔自在又好大壓力,令到不期然想盡量大力d,踢到砰砰聲,自己都覺得驚,阿蛇話有2個初學嘅男仔見到我,2個喺度交換咗一個"呢條女係咪喪架"咁嘅眼神....真係好傷心...我都係鍾意上女仔班多d...

D泰仔導師唔識講英文,d中文又唔係咁好,佢地最常講嘅都係「大力d」、「一齊一齊」、「放輕鬆」、「慢慢黎」、「轉腰」、「高d」...今日阿蛇話好似咸片對白,好好笑,我同公主勁鬧佢變態,真係完全冇諗過呢樣嘢囉!d人心邪諗d嘢真係唔同d!

玩左幾個月,同d導師都開始熟絡,我最鐘意同andy打,雖然我估佢40歲喇,但我真係覺得佢超有型,佢又好鍾意撩我玩,成日叫我笑,誰不知有個叫保保嘅導師唔知係咪想同我扮friend,我行過佢踢左我個pat pat一下囉!我好嬲呀!嬲到爆,跟住我好大力咁踢番佢,之後俾左一個我好嬲嘅眼神然後走左,呢一刻我超後悔冇鬧佢,我驚佢以為我好鍾意同佢玩!

打完後就去左跑步,跑左一個鐘,8km.我目標係一個鐘10km,希望渣打馬拉松可以around一個鐘內完成。

十萬個期待

想講下5件好期待嘅事。

大閘蟹嘅季節又到了,搞到我鬼死咁緊張，我諗ｄ蟹都緊張埋，因為我會食晒佢全家！一早約定d 朋友食大閘蟹喇，仲要諗定邊度買支靚花雕，真係人生一大享受。我等左啲大閘蟹十個月喇，等得好辛苦！

期待已久嘅夜潛活動終於成行喇，又係搞到我好緊張，特登買咗支新電筒同埋終於可以帶部 G11試影夜水。好想快d去，好難忍，呢個星期千祈唔可以病。

夏天就來完結喇，最後一次海灘玩水活動終於搞得成，又可以碧波暢泳，游完水一定要食炸雞肶薯條加凍檸樂，超級罪惡但今年最後一次，唔緊要啦～

秋天來臨，今日終於定左下次行山日期，仲要係去鳳凰山睇日出，開心到而家！呢一日等左好耐喇，隻腳日日話俾我聽好想行山，個心又超緊張，諗定著咩衫去行，好想而家即刻起程！今次要等一個月半，真係好長啊，可唔可以提早去呀？夜晚之嘛...

忍唔住都要講埋11月嘅orbis moonwalker，11個人去真係咁大個人都未試過咁浩浩蕩蕩去行廿幾km。期待可以大家配合下扮鬼扮馬~其實我係幾贊成扮乞丐因為唔使特別晒錢去置裝，因為我真係好窮啊！不過原來個主題係光與影．．．咁點啊？好緊張呀～11月快d到啦！

充滿期待嘅人生實在太美好～我覺得好幸福呀^^