Keroro狂熱

零食物語絶對是香港第一罪惡溫床，擺放上百款零食是甚麼意思?想測試我的定力繼而破壞我的減肥計劃吧! 幸好已吃了麵包乙塊，才不被它引誘．．．正想回報一個不屑的眼神時，竟發現櫥窗放置了一套五款keroro玩具，分別是5個成員的基地，這5個基地可合併起來成為一個超級基地．．．係．．．今年已經廿多歲的我，買咗一套．．．

















我可以告訴你，32蚊一盒是超值的，因為每一款模型都很精美，完成的基地每一個都有機關，好似giroro的機地就有一把機關槍，可以發射子彈，射程可達一張飯枱咁遠！至於tamama的機地，一按鈕，tamama就會掉進一條通道，跌出來時它已經穿了衣服扮人。最好玩的其實是keroro的機地，一按制，keroro就會掉進管道，跌入飛碟，連人帶碟跣出街！
合併起來的機地更好玩，冇呃你，外型仲非常可愛！零食物語的確很過份，我又用左$160啦！

打牛工

自畢業後，已經打了三年工。計落條數，如果工作到50歲退休的話，我仲要做多20幾年，諗起呢度個人就好失落。做左野三年，覺得已經冇晒對工作既熱誠，尤其係辭左工呢2個星期，一到6點就想執嘢走，同以前晚晚做到12點幾仲好精神呢段日子好唔同。我諗左好耐，我終於知道自己呢排心情低落既原因，就係本身個人好犯賤。以前日日由朝忙到晚，晚晚做通宵趕project，係好辛苦，但係喺工作既層面上，感覺好充實，亦好有成功感，但係諗番呢幾個月，由於公司架構變動，好多program都pend住左，日日番工唔係為左幫公司賺錢，而係去應付果班小人，真係令人覺得好灰。看得出老板咖哩原本剛進公司的時候都好有熱誠，不過佢千算萬算都算不到香港公司咩都唔多，所有resources都缺乏既時候，唯一最多既就係上手老板留落黎既蘇州屎同埋一班多事既女人。不過搞到今日既田地，咖哩自己都要負番一部份既責任，如果佢唔係一意孤行，又唔聽人意見，都唔會俾人叫做昏君。原本仲有皇阿媽係度，一個唯一可以鎮壓住咖哩既上司，諗住有佢就可以同果班女人抗衡，點知一直好tough既佢，都頂唔住呢度既政治而番馬來西亞了。Marketing得3個人，2個星期前3個人一起遞辭職信，外人覺得我地玩嘢，但又有幾多人真係明白我地一直承受緊既壓力呢？

蛋怪

蛋，是世界上最好吃的食物！

由細到大都勁鍾意蛋，唔知大家記唔記得，小學的時候寫很多紀念冊，通常都好似查家宅般問好多好多問題，好似鍾意咩明星呀，志願呀，或者係暗戀的人咁。如果問到我最喜愛的東西／食物，我只有一個答案，就係蛋！好細個我已經識煎蛋食了，有時阿媽買左蛋放喺雪櫃，就算唔肚餓我都會心思思想煎蛋食，有時煮生熟蛋，水蛋，燉蛋，或者得閒少少煮番茄炒蛋。

煎蛋嘅最高境界，就係煎到隻蛋有少少燶邊，蛋白熟透，但整個蛋黃依然保持流質狀態。本人擁有超過20年煎蛋嘅經驗，已經掌握到煎靚蛋嘅曉門，唔係你估！

首先，一定要開大火，燒紅隻鑊。我屋企用開普通的易潔鑊。
可以用手放於離鑊面3吋左右，feel到有少少興興地就岩嘞！
跟住慢慢落油，首選係花生油，香啲。大約落2個湯匙的油左右就夠了。
"浪"下d油，等10秒左右，轉細火。用大火煎蛋會好快燶同痴底。
打蛋。搖下個鑊，再用鑊鏟將蛋黃邊的蛋白撥到周圍，令到蛋白平均咁鋪滿鑊面受熱。
用鑊鏟載起少少油，淋在蛋黃上，重複6至7次。
不時用鑊鏟鏟起隻蛋，令它燶得來又唔會痴底。
大約1分鐘左右，會開始聞到有少少燶味，是時候上碟了！
最後灑上少許海鹽，大功告成！

真係好好味啊～～～～～～！！